Hindi nakapagtapos ng high school si Rex dala ng pangamba ng kanyang mga magulang na di niya makayanan ang hamon ng mundo sa labas ng kanilang tahanan. Natuto siyang bumasa at sumulat sa pamamagitan ng butihin niyang tiyahin na nagtiyaga sa kanyang magturo.

20-taong gulang na si Rex nang siya mismo ang magpasyang magpatuloy sa pag-aaral at makipagsabayan sa lipunan. Naipasa niya ang acceleration program para sa high school at agad nag-aral sa Trinity University.

Naging aktibo siya sa pamantasan at nagawang isakatuparan ang kanyang adbokasiya na magkaroon ng tamang pasilidad para sa mga kapwa estudyanteng may kapansanan kaakibat ang scholarship program na kanya ding isinulong bilang project coordinator.

Nang magbalik sa Daet, Camarines Norte naging abala siya sa pangangasiwa ng mga samahang tumutugon sa pangangalaga at karapatan ng mga may kapansanan sa kanilang local government at maging sa simbahan.

Nagsasagawa siya ng mga advocacy seminars katulong ang mga taong buo ang pangangatawan para sa mga taong may kapansanan. Masigasig din siyang nakikipagtulungan bilang Couples for Christ member sa Gawad Kalinga Projects ng simbahan kaagapay ang kanyang asawang si Mariz.

Isa ring Barangay Mentor si Rex para sa mga barangay na mabagal pa ang pag-unlad. Nagbibigay siya ng libreng pagsasanay upang maging matatag at makatayo sa sarili ang mga residente ng mga barangay na ito. Kasabay nito ay isinusulong din ni Rex ang alternative learning system (ALS) para sa mga out-of-school youth. Ang programang ito sa mga barangay ay sinusuportahan ng Asian Institute of Management International Movement of Development Managers kung saan isa siya sa mga aktibong miyembro.

Sa kabila ng kanyang kapansanan - ang kanyang mga paa, hita, binti at maging ang kanyang kanang kamay ay di na kapaki-pakinabang - nananatili siyang matatag sa buong pusong paglilingkod na walang hinahangad na anumang kapalit at ang tanging sandata ay ang kanyang talino.